পররাষ্ট্রমন্ত্রীর কাছে – লন্ডন প্রবাসী সৈয়দ দুলালের খোলা চিঠি

(যেহেতু বেশীর ভাগ প্রবাসী  সিলেটের – তাই সিলেটের আঞ্চলিক ভাষায় মনের আকুতি তুলে ধরলাম)
সোনার বাংলার সুনামধন্য,মাননীয় পররাষ্ট্র মন্ত্রী জনাব আব্দুল মোমেন সাহেব,আমরা লন্ডন প্রবাসী হিলে ঠাণ্ডায়,আর করোনায় কুপোকাত অতি দুঃখী,দেশ ফাগল সরল সোজা মানুষ গণের পক্ষ থাকি বুকভরা দুঃখযুক্ত সালাম নিবা |আশা খরি মাবুদ আল্লাহর কৃপায় আর আউলিয়াকুল শিরোমনি হজরত শাহজালাল শাহ পরাণের পুণ্যভূমি সিলেটে আফনি ভালাও সুস্থ আছৈন |আমরার খতা আর কিতা খইতাম খঊকা,না ঘটকা না ঘরকা !!
আমরার দুঃখ কইবার জায়গা নাই,কষ্ট কইবার ও জায়গা নাই !
আপনি আমরার সিলটি ভাই,সিলটি নেতা,সিলটি মন্ত্রী,এর লাগি সিলটি ভাই বইনর দুঃখ সুখ কইবার লাগি,সিলটি ভাষায় এই খোলা চিঠি খান লিখলাম |ইচিঠি আফনার চখুত পড়বো খরি আশা নাই,
লন্ডন থাকি গিয়া বড়ো খারাপ অবস্থায় আছেন আমারার মানুষ |নিজর টেখায় নিজে থাইক্যা খাইয়া ও নানা রখমর হয়রানির মাঝে থাইক্যা কাইঁন্দা বুক ভাসায়রা |
আইজ কাইল দুঃখর কথা,কষ্টর কথা কইলেও অনেকে নানান দোষ তুকাইন !খালি বুঝদারি মাত,আর খালি আক্কল দেখাইন |খতায় আছে “তর ঘাঁ তর দুখ
বুঝবো খেমনে গাউর লুক”
আমরা রাজনীতি তুরা তুরা অনে বুঝি,কিন্তু অততা বুঝিনা,বুঝলে ই লেখা খান ও আফনের গেছে লেখতে পারতাম না |ইকান বুঝি মানুষর ভালার জন্যই আফনারা রাজনীতি করোইন,সরকারর বড়ো বড়ো এমপি মন্ত্রী অইন |এর লাগি আফনারা বিদেশ আইলে আমরা ফুলোর তোড়া হাত দিয়া,চিল্লাইয়া গলা ফাটাইয়া আমরার ভালোবাসা সম্মান আফনারারে জানাই |আর খত খুশি অই|আমরা বিদেশ বইয়া রাস্তাঘাট,পুল,বাড়ী,ঘর,বিদ্যুৎ,স্কুল কলেজ,সব জাগাত উন্নতি অর দেইখা বুক ফুলাইয়া বাংলাদেশী খইয়া কথা  খই |

আমরার বাংলাদেশ আমরা দেইখ্যা আল্লাহর কাছে দোয়া করি,আরো উন্নতি হইতো আমরার দেশর,দেশর মানুষর |দেশর উন্নতি দেখলে কার না ভালা লাগে খউকা চাইন |আর ই উন্নতির পিছনে প্রবাসী বাংলাদেশির রখত ফানি খরা পাউন্ড,ডলার,দিরহাম,রিয়াল,মার্ক খম নায় |
মাননীয় পররাষ্ট্র মন্ত্রী মহোদয়,
করোনায় সারা দুনিয়ার বিশ লাখর উপরে মানুষ মারা গেছৈন |
আরো কতো লাখ মরবা আল্লাহ ছাড়া কেউ জানোইন না |বর্তমানে বিলাতর অবস্থা খুব খারাপ থাকি একজেরা ভালার পথে আলহামদুলিল্লাহ |আফনে জানোইন,আমরা সিলটি মানুষরা নভেম্বর থাকি,মার্চ পর্যন্ত দেশও দল বান্দিয়া যাই|
এসময় দেশের আবহাওয়া ভালা থাকে,
ইংলিশে হলিডে কইলেও আমরা ইতারে কই মাটির টান,খেশ কুটুমের মায়া,ধূলা বালি মাখার লাগি বাড়িত যাওয়া |
আর ঔ মায়া খানোর লাগি আমরা দেশও যাই-বউ বাইচ্চা ফুয়া ফুরি লইয়া |হাবিগুষ্টি মিল্যা ফায় ফুর্তি কইরা দুই চাইর হপ্তাহ থাইক্যা আবার আইয়া যাঁর যাঁর খামো লাগি |হাজার হাজার ফন রুজি কইরা,ঘর বানাইতাম,জমিন কিনতাম,ইলেকশনে খাড়া অইতাম,গরীব দুঃখীরে সাহায্য খরতাম,
পরিবার পরিজনর মুখও আসি ফুটাইতাম |
কিন্তু-ই বছর কেউ ফায় ফুর্তির লাগি দেশও যাইরানা |
কেউ যাইরা বেমারি দেখবার লাগি,
কেউ যাইরা জায়গা সম্পদর টিকটাক করার লাগি,কেউ যাইরা বিশেষ জরুরি কামে |
হুইন্যা হয়তো আফনার ভালা লাগবো
কেউ কেউ দেশ যায়রা বাঁচবার লাগিও |
হারা জীবন রুজি কইরা যে ঘর,যে বাড়ী বানাইছন ওউ বাড়ি ওউ ঘর কয়দিন থাইক্যা যদি বাচাঁ যায় |কারণ করোনার বিষাক্ত ছোবল বয়স্ক মানুষরে টিফায় টাফায় লইয়া যারগি |
যাঁর গেছে হে জানে তাঁর খত দুখ |
যাঁরা যায়রা,যাইবার একদিন বা দুই দিন আগে তাঁরা একশো পার্সেন্ট জেনুইন কোরনার টেস্ট সার্টিফিকেট লইয়া প্লেনও উঠরা,ইকানো দুই নম্বরির কোনতা নায় |
এখন আফনে খঊকা দেখি –

এই যাত্রী অখলরে খেনে সাত দিন হোটেলে রাইখ্যা কোয়ারেন্টাইন নামের,
জেল খাটানি অইতেছে !যুদি মনে খোরোইন তারার করোনা আছে কি না দেখা জরুরি,তারারে বাড়ি গিয়া দুই দিনোর ভিতরে কোরোনা টেস্টের অর্ডার দিলেইতো ভালা ওইতো |না খরলে আইনি ব্যবস্থা নিলে খেউ কুনতা খইতো নায়,বিলাত যাঁরা তাখইন আইনরে শ্রদ্ধা তাঁরা আরো বেশি ওউ খোরোইন |

আর আমরা যাঁরাই ইংল্যাণ্ড থাকি যাই,
আমরা তো আমরার মা বাপ ভাই বইন বন্ধু বান্ধবরে মারবার লাগি যাই না |
আমরার গতরো যদি কোরনা থাকে বুঝিলাই -আমরা তো দূরে দূরে এমনিতেই থাকমু,না মিছা কইলাম ? চ্যানেলে এসর খবরও দেখলাম,
মানুষ হোটেল নামের জেলো বন্দি অইয়া আউ আউ খরি খানরা |
খেউ মরা মা দেখতো গেছইন,
কেউর মার্ স্ট্রোক কইরা হাসপাতাল,
হায়রে হায় !হোটেলও ছলের ব্যবসা !
এখন লাশরে খে ফর দিবো সাতদিন,আর স্ট্রোক করা রোগী তাইন অই কয়দিন বাঁচবা,আর কিলা দেখবা কইলজার টুকরা মারে লন্ডন ফেরত ফুত |আরো দেখলাম,মানুষে দুঃখ কইবার লাগি কেউরে কেউ খুঁজিয়া পায় না |এনরে খইলে হেনরে দেখাইয়া দেয় |হোটেলের রোমও বইয়া বইয়া আল্লাহ আল্লাহ করা ছাড়া,বুড়া জোয়ান,হুরুত্তাইনতর কোনতা করার নাই,কী কষ্টর খতা,নিজের বাড়িতে নিজে বৈতল !
মাননীয় মন্ত্রী,এই অবস্থা থাইক্যা আমরারে মুক্তি দিতে আফনার গেছে আমরা আকুল আবেদন জানাইরাম |

একজন সিলটি অইয়া আরো একজন সিলটির কষ্ট,প্রবাসী মন্ত্রী ওইয়া একজন প্রবাসীর কষ্ট আফনে ছাড়া আর কেউ ভালা বুঝতো নায় |
আফনে যত তাড়াতাড়ি ফারইন,বিশেষ বিবেছনায় আমরার লাগি ভালা কোন ব্যবস্তা করুক্কা |দেখবানে আল্লাহ দুনিয়া আখেরাতে আফনারে এর ফায়দা দিবানে |
লেখায় ভুল ত্রুটি অইলে খমা কইরা দিবা |ফেইসবুকর যুগ এখন সবাই লেখতে পড়তে যেমন ফারইন,এর থাকি বেশি ফারইন ভুল ধরতে |আফনে সুস্থ থাউক্কা,ভালা থাউক্কা |দেশর মানুষর শান্তি আর সুখ অউক খামনা খরি |

ইতি
সৈয়দ দুলাল
ইংল্যান্ড ফরবাসী
(আফনার নানা বাড়ীর মানুষ)